ໃນວັນທີ 16 ກຸມພາ 2026 ທີ່ ເເຂວງ ຫຼວງພະບາງ – ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແລະ ປະທານຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ພ້ອມດ້ວຍຄະນະ, ໄດ້ລົງເຄື່ອນໄຫວຢ້ຽມຢາມຫ້ອງການຫຼັງໃໝ່ ແລະ ສູນຢ້ຽມຢາມໂຄງການເກັບກູ້ລະເບີດແຫ່ງຊາດ ປະຈໍາ ແຂວງ ຫຼວງພະບາງ, ພ້ອມທັງໄດ້ລົງຕິດຕາມວຽກງານຕົວຈິງໃນການແກ້ໄຂບັນຫາລະເບີດບໍ່ທັນແຕກຢູ່ແຂວງຫຼວງພະບາງ ເພື່ອຊຸກຍູ້ການກະກຽມຄວາມພ້ອມການເປັນເຈົ້າພາບ ແລະ ປະທານກອງປະຊຸມທົບທວນ ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3.
ຈຸດປະສົງຂອງການລົງເຄື່ອນໄຫວໃນຄັ້ງນີ້ແມ່ນເພື່ອຍົກສູງຂີດຄວາມສາມາດໃນການຈັດຕັ້ງປະຕິບັດຍຸດທະສາດ ຂອງ ຄຊກລ ແລະ ຕິດຕາມການຈັດຕັ້ງປະຕິບັດການສຳຫລວດ-ກວດກູ້ລະເບີດບໍ່ທັນແຕກ ລວມທັງການປະຕິບັດຕາມມາດຕະຖານແຫ່ງຊາດ ສະບັບປັບປຸງປີ 2025 ຂອງບັນດາອົງການປະຕິບັດງານດ້ານມະນຸດສະທຳ.
ຄະນະຜູ້ແທນໄດ້ລົງຢ້ຽມຢາມສະໜາມເກັບກູ້ຂອງໂຄງການເກັບກູ້ລະເບີດແຫ່ງຊາດ ຢູ່ ບ້ານ ຫາດຄໍ້, ເມືອງ ປາກອູ ແລະ ລົງສໍາຫຼວດພື້ນທີ່ທີ່ມີລະເບີດບໍ່ທັນແຕກຕົກຄ້າງຢູ່ ບ້ານ ພິກໃຫຍ່, ນະຄອນຫຼວງພະບາງ ເຊິ່ງສະຖານທີ່ດັ່ງກ່າວແມ່ນຈະຖືກກຳນົດເຂົ້າໃນວາລະກະກຽມເພື່ອຕ້ອນຮັບການຢ້ຽມຢາມພາກສະໜາມຂອງຄະນະຜູ້ແທນລະດັບສູງ ໃນໄລຍະກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3, ເຊິ່ງກຳນົດຈະຈັດຂຶ້ນໃນລະຫວ່າງວັນທີ 14-18 ກັນຍາ 2026 ທີ່ ນະຄອນຫຼວງວຽງຈັນ, ພາຍໃຕ້ຫົວຂໍ້: “ຊຸກຍູ້ຄວາມຄືບໜ້າໃນການຈັດຕັ້ງປະຕິບັດສົນທິສັນຍາເພື່ອສ້າງໃຫ້ໂລກນີ້ປາສະຈາກໄພຂົ່ມຂູ່ຈາກລະເບີດລູກຫວ່ານ”, ກອງປະຊຸມດັ່ງກ່າວ ຄາດວ່າຈະມີການຕ້ອນຮັບຄະນະຜູ້ແທນປະມານ 700-900 ທ່ານ ຈາກຫຼາຍກວ່າ 150 ປະເທດ.
ທ່ານ ທອງສະຫວັນ ພົມວິຫານ ໄດ້ກ່າວວ່າ “ບົດບາດຂອງ ສປປ ລາວ ໃນນາມປະເທດເຈົ້າພາບ ແລະ ປະທານກອງປະຊຸມ ແມ່ນບໍ່ພຽງແຕ່ໜ້າທີ່ທາງການທູດ ເທົ່ານັ້ນ, ແຕ່ຍັງແມ່ນຄວາມຮັບຜິດຊອບອັນສູງສົ່ງຕໍ່ສາກົນ ທີ່ມີເນື້ອໃນຕິດພັນກັບປະຫວັດສາດ ແລະ ຄວາມໝາຍໝັ້ນອັນແຮງກ້າຂອງພວກເຮົາ ເພື່ອອະນາຄົດທີ່ປອດໄພ ຈາກລະເບີດບໍ່ທັນແຕກ”.
